Hér núna, allt

Hér núna  býður upp á námskeið, fyrirlestra, markþjálfun og ráðgjöf í jákvæðri sálfræði sem bæta geðheilsu og hjálpa fólki að blómstra.  

Námskeið sem eru í boði eru tvær gerðir sjálfsþroskanámskeiða:

Annars vegar Styrkleikarnir þínir og Styrkleikarnir okkar (fyrir pör) þar sem áherslan eru á persónulega styrkleika en einnig er kynning á núvitund og sjálfsvinsemd. Námskeiðin henta vel inn á vinnustaði, því rannsóknir sýna að þessir þættir bæta samskipti, heilsu og vellíðan og vinnur þannig gegn kulnun. Tilgangurinn er að veita innsýn í eigin styrkleika og gildi og auka þannig líkur á að blómstra í starfi sem og einkalífi.  Styrkleikanámskeiðin eru fjögur skipti, 2 tíma í senn, kennd á Akranesi og í Reykjavík, á vegum Hér núna en hvar sem fólk vill þegar fyrirtæki kaupa námskeið.

Hin gerð námskeiða Blómstrandi þú, fjallar á víðtækari hátt um þá þætti sem stuðla að því að fólk blómstri. Það stendur 6 vikur einn og hálfan tíma í senn og farið er í gildi, styrkleika, núvitund, þrautseigju, von, sjálfsvinsemd, jákvæðar og neikvæðar tilfinningar. Þetta námskeið getur bæði hentað fyrir uppbyggingu eftir veikindi og sem leið að almennum sjálfsþroska. Tveir kennarar sjá um námskeiðið sem tekur hámark 25 manns. 

Starfsdagar. Við getum bæði séð um starfsdaga eða komið inn með innlegg hluta úr degi. Bæði fyrirlestur eða stutt námskeið. Starfsdagar eru unnir í samvinnu við vinnustaðinn. Dæmi um stutt námskeið (hálfan dag) eru:

1. Núvitund og sjálfsvinsemd, fræðsla og æfingar
2. Styrkleikar mínir og hópsins, m.a. notuð styrkleikakort
3. Þrautseigja, gildi tilfinninga og bjartsýni
4. Styrkleikamiðuð stjórnun. Ábyrgð stjórnandans á sínum tilfinningum, starfsanda og velferð starfsmanna

Fyrirlestrar í boði eru um góð og slæm áhrif streitu, sjálfsvinsemd, góðvild, leik, flæði og sköpun, núvitund, tilfinningar og samskipti á vinnustað. Væntanlegir eru fyrirlestrar um uppeldi og meira um góða stjórnunarhætti.

Til að fá hugmynd um fyrirlestraefni má lesa pistla Steinu sem fjalla um ýmis áhugaverð sálfræðileg efni. Flestir þeirra hafa áður birst í Skessuhorni (sjá: //skessuhorn.is/adsendar-greinar)

Ráðgjöf er hægt að veita bæði einstaklingum sem hafa áhuga á að blómstra og fyrirtækjum sem hafa áhuga á að starfsfólkið blómstri og þar með starfsemin. Einnig getur verið heppilegt að hafa eftirfylgni eftir námskeið ef fólk vill fara nánar eða dýpra í efnið eða bara minna sig á að nota það. 

Markþjálfunarviðtöl henta bæði fyrir vinnustaði sem vilja að starfsfólkið vaxi og þroskist í starfi en einnig henta þau fyrir sjálfsþroska hvers og eins og sem viðbót við námskeiðin.

Markmið fyrirtækisins er að stuðla að því að fólk og samfélag okkar blómstri, námskeið fyrir námskeið. athugið að til að börnin okkar geti notið uppeldis sem stuðlar að þeirra velferð og blómstrun, fer best á því að við fullorðna fólkið séum betri og þroskaðri. Fyrir hvert og eitt okkar getur leiðin að betri heimi byrjað hvenær sem er til, til dæmis hér og nú.

Fyrirlesarar og námskeiðshaldarar Hér núna eru Steinunn Eva Þórðardóttir og Rakel Magnúsdóttir.

Steinunn Eva er reyndur sálfræðikennari, lýðheilsufræðingur, með sérhæfingu (diplóma á mastersstigi) í jákvæðri sálfræði og er á lokametrunum í þjálfun sem markþjálfi. Hennar aðaláhugi beinist að því að byggja upp fólk með blöndu af styrkleikaþjálfun, aukinni núvitund og markþjálfun.

Rakel Magnúsdóttir er hjúkrunarfræðingur frá Háskóla Íslands, með meistaragráðu í kynjafræði. Hún hefur einnig lokið diplómanámi á mastersstigi í jákvæðri sálfræði og námi í hugleiðslu- og núvitundarkennslu frá School of Positive Transformation í Bretlandi. Áhugasvið Rakelar innan jákvæðrar sálfræði er núvitund, styrkleikar og að rækta jákvæðar tilfinningar.

Báðar höfum við mikinn áhuga á því að láta gott af okkur leiða með því að kenna raunprófaðar aðferðir jákvæðrar sálfræði til að auka hamingju og vellíðan fólks í leik og starfi.  Núna erum við að bæta við okkur þjálfun í að leiða námskeið sem samþættir núvitund og styrkleikanálgun. Gríðarlega spennandi 🙂